فراکسیۆنا پارتی بەیاننامەیەک بڵاڤکر

فراکسیۆنا پارتی بەیاننامەیەک بڵاڤکر و داخوازا تەمامکرنا ڕێکارێن روونشتنا ئێکێ یا پەرلەمانی دکەت

فراکسیۆنا پارتی دیموکراتی کوردستان ل پەرلەمانێ کوردستانێ بە هەلکەفتا دەربازبوونا دو ساڵان ب سەر ئەنجامدانا هەڵبژارتنێن خولا شەشێ بەیاننامەیەک بڵاڤکر، تێدا جەختێ ل سەر پێدڤیا دەستپێکرنا چالاککرنا پەرلەمانی، هەڵبژارتنا دەستەیا سەرۆکایەتیێ و بجهئینانا ئەرکێن یاسایی و مێژوویی دکەت ب بێ گرێدانا وێ ب ململانێیێن سیاسی ڤە.

دەقێ بەیاننامەیا فراکسیۆنا پارتی ب بۆنەیا دو ساڵیا هەڵبژارتنا خولا شەشێ یا پەرلەمانێ کوردستانێ:

ئەڤرۆ دو ساڵ دەرباز دبن ب سەر ئەنجامدانا هەڵبژارتنا خولا شەشێ یا پەرلەمانێ کوردستانێ. ئەو ڕۆژا هاووڵاتیێن هەرێما کوردستانێ ب ئاستەکێ بلندا پشکداریێ و ب بەرپرسیاریەتیڤە دەنگ دایی و ئیرادەیا خۆ بۆ پاراستن و پاشەڕۆژەکا گەش بۆ هەرێما کوردستانێ دیار کری، بەلێ مخابن تا نوکە پەرلەمانێ کوردستانێ یێ چالاک نینە و نەشیاینە ئەرکێن یاسایی یێن چاڤەڕێکری ل سیستەمێ حوکمرانیا هەرێما کوردستانێ بجهبینیت.

ئەم ل فراکسیۆنا پارتی دیموکراتی کوردستان، ل دەمەکی جەختێ ل سەر هەڵویستێ خۆ یێ نەگۆڕ ل ڕێزگرتنا بنەمایێن دیموکراسیێ و چالاکیا دامەزراوەیێن هەرێمێ دکەین ڤە، دوپات دکەین ڤە کو ئەم هەرسەم ئامادەی چالاککرنا پەرلەمانی و گرێدانا کۆمبوونێن وی بووینە. هەردەم ژی خودان و پشتەڤانێن هەمی پێنگاڤ و دەستپێشخەریەکێ بووینە ئەوا بۆ ڤێ مەرەمێ هاتینە پێشکەشکرن، لەورا بانگهێشتا تمامی فراکسیۆنێن بەڕێز یێن پەرلەمانێ کوردستانێ دکەین، دا هەرچی زووترە پێکڤە ب ئەرکێ خۆ یێ مێژوویی و یاسایی ڕاببن و پێنگاڤان پاڤێژین بۆ تەمامکرنا ڕێکار و ئەرکێن روونشتنا ئێکێ یا پەرلەمانی و هەڵبژارتنا دەستەیا سەرۆکایەتیا وی، وەکو دەستپێکەکا گرنگ بۆ چالاککرنا پەرلەمانێ کوردستانێ، و ژپێخەمەت ڕێزگرتن و بەرسڤدانا داخوازیا هەمی چین و توێژێن هەرێما کوردستانێ ل بلەزکرنێ ل چالاککرنا پەرلەمانی دا.

هەروەسا فراکسیۆنا مە، پابەندبوونا خۆ بەراورد ب دەنگدەرێن پارتی و جەماوەرێ کوردستانێ دوپات دکەت ڤە، و ب دیتنا مە ئەرکێ پاراستنا قەوارەیێ هەرێما کوردستانێ و بەرژەوەندیێن باڵا یێن وێ، ل سەر ملێن تمامی فراکسیۆن و ئەندامێن پەرلەمانیە. لەورا ژی چالاککرنا پەرلەمانی نابیت بهێتە گرێدان ب ئەگەرێ چو بەرژەوەندی و ململانێیێن سیاسی و حزبی ڤە، چونکی ئەڤە شەرعیەتا دەنگێ خەڵکی و شەرعیەتا مانەڤەیا قەوارەیێ هەرێما کوردستانێ یە.

ل دوماهیێ، هیڤیدارین ئەڤ دۆخێ نالەبار دەرباز ببیت و ب دیتنەکا هەڤپشک و بۆ پێشئێخستنا بەرژەوەندیێن هەرێما کوردستانێ، هەمی پێکڤە ب چالاککرنا پەرلەمانێ ڕێزێ ل ماف و ئیرادەیا خەڵکێ کوردستانێ بگرین، و پێکڤە پێنگاڤان پاڤێژین بۆ قۆناغەکا نوو یا کارێ پەرلەمانی و بەرەڤپێشبرنا پرۆسەیا یاسایی و حوکمرانیا هەرێما کوردستانێ ژ هەمی ڕوویان ڤە.

فراکسیۆنا پارتی دیموکراتی کوردستان ل پەرلەمانێ کوردستانێ
20/ 10/ 2026