ئایفۆن ١٨ د بازاری دا: پێشکەفتنەکا تەکنەلۆژی یان بتنێ خەرجییەکا زێدە؟
جڤاکناس : بــلال عثمــان اسـلام
دگەل ڕاگەهاندن و بەردەستبوونا ئایفۆن ١٨ د بازارێن جیهانی و ناڤخۆیی دا، جارەکا دی پێلەكا مەزن یا کڕینێ و ململانێیێ ژ لایێ بەکارهێنەرانڤە دەستپێکریە ، لێ د ناڤ ڤێ جۆش و خرۆشیێ دا، پرسیارەکا گرنگ خۆ د سەپینیت : ئەرێ بڕاستی کڕینا ڤێ جورێ مۆبایلا نوی ژ لایێ هەمی کەسانڤە پێدڤییە ، یان ژی بۆ زۆرینەیا خەلکی بتنێ مەسرەفەکا زێدە و بێ هزرە؟
ڕاستیەکا حاشاهەڵگر هەیە کو دڤێت ل دەمێ شرۆڤەکرنا ڤێ دیاردەیێ د بەرچاڤ بهێتە وەرگرتن ، زوربەی وان کەسێن کو ب لەز پارەیەکی خەیاڵی بۆ کڕینا نویترین مۆدێلا ئایفۆنێ دمەزێخن ، ب شێوەیەکێ دروست و تەمام مفای ژ هێز و تایبەتمەندیێن وێ یێن نوی وەرناگرن ، کۆمپانیا ئەپڵ د ڤی نەوەیێ نوی دا تەکنەلۆژیایێن زۆر پێشکەفتی ، پرۆسێسەرێن ب هێزتر و سیستەمێن کامیرەیێن ئاڵۆز زێدەکرینە کو ب تایبەتی بۆ کەسێن پرۆفیشناڵ و ئەندازیاران هاتینە دروستکرن ، لێ د بەرامبەر دا ، پرانییا بەکارهێنەران ڤی ئامێرێ ب هێز بتنێ بۆ گەڕیان د سۆشال میدیایێ دا ، پەیوەندیێن ڕۆژانە ، و وێنەگرتنەکا ئاسایی بکاردهینن ، بێگومان ئەڤ کارە ب ئایفۆنێن کەڤنتر یێن وەکی مۆدێلێن ١٥ یان ١٦ ب باشترین شێوە دهێنە کرن و چ کێماسییەک تێدا نینە.
ژ لایەکێ دیڤە، گۆهڕینا مۆبایلێ ب شێوەیەکێ سالانە و کڕینا بوهاترین مۆدێل ، زیانەکا ئابووری یا بەرچاڤ دگەهینیتە تاکەکەسی و زۆر جار ئەڤ پارەیە لسەر حسێبا پێدڤیێن دی یێن گرنگتر یێن ژیانێ دهێتە خەرجکرن ، ئەگەر ئەم ب هووربینی بەرێ خۆ بدەینە جڤاکی دێ بینین کو دیاردەیا چاڤلێکرنێ و حەزا خۆدەرخستنێ بوویە ئەگەرێ هندێ کو کڕینا ئامێرەکی وەکی ئایفۆن ١٨ پتر گرێدایی دیارکرنا ئاستێ کۆمەڵایەتی و مۆدێلێ بیت ، نەک ژبەر پێدڤیبوونا مرۆڤی ب تەکنەلۆژیایەکا نوی ، ئەڤەژی تاکێ مە دێخیتە د چوارچێڤەیێ بەلاڤکرن و مەزاختنا پارەی بتنێ بۆ ڕازیکرنا دەوروبەران دا.
بێگومان هاتنا ئایفۆن ١٨ پێشکەفتنەکا تەکنەلۆژی یا مەزنە ، لێ ئەڤ ئامێرە پتر بۆ وان کەسانە یێن د بوارێ بەرهەمهێنان ، دیزاین و کارێن پرۆفیشناڵ دا کار دکەن بۆ بەکارهێنەرێ ئاسایی، مانەڤە ل سەر مۆبایلەکا باش یا نوکە کو بێ کێشە کار دکەت، بڕیارەکا ئابووری و ژیرانەترە ، ئەرکێ ڕاگەیاندنێ و هۆشیاریا تاکەکەسییە کو بەرەڤ بەکارهێنانەکا دروستتر یا تەکنەلۆژیایێ ڤە بچین و بتنێ ل دویڤ پێدڤیێن خۆ یێن ڕاستەقینە پارەی خەرج بکەین ، نەک ل دویڤ ڕێکلامێن بازرگانی.
