ستێر و دل
ستێر و دل
قهرمان عبدالله حمید بەرواری
(دیاری بۆ گیانێ زوهێر سلێمان کورێمەی)
هزار جاران من چاڤێن خۆ ڤەکرن
ستێران ل سەر گەلەک ملان خۆ نخوین دکرن
دێوان دفنێن خۆ بلند دکرن
منەت و قەنجی د گەل ئاخێ دا دکرن
بەلێ ستێر د حەزرەتا وی دا دبوونە دارهژیرێن
بەژنێن خۆ خوار و نخوین دکرن
ستێران ل سەر ملێن وی شەرم دکرن
پلەیان ل هەمبێزا وی خۆ گەش و ڕەونەقدار دکرن
ئەوی خۆ خزمەتکار ددیت
دەستێن وی ئاڤ تێدا دمەهی و
پێن وی ڕێکا خێبەتا ئێتیم و سێویان ددیت و
ڕێکێن سەرئەڤراز دبڕین
ئەی هەڤالێ من، ئەی برایێ نە ژ دایک و بابێن من
بیست سالێن ڕەبەق بۆرین
بیست برینێن دەڤبەش کرین
بیست ئاخ و ئۆف و گرین
بیست ژێهەلی و ژۆردانیێن قادا بەڕین
هەمان گرنژین، هەمان عەشق و ئەڤین، هەمان دەنگێ شرین
بیست سال نکارین.. نەء.. ئاخا مێران بکەنە تۆز
ئاسنێ شێران بکەنە ژەنگا دەڤێ خەونەکا بۆز
هەمان مەشیا ل باخچەیێ زانینگەهێ لێ بوو
هەمان کەنیا پاقژییا ل دایینگەهێ ڤێ بوو
کلیلا قشلەیا شەرمێ
د دەستێن وی دا دبوو ستڤانک و ناسناڤ
ب گرنژینەکا ژ ڕونیا (ئاڤا زەمزەم)
دەرگەهێن چاڤ و دلێن ماندی ڤەدکرن
کەنی دکرە تیروژکێن پرت و بەلاڤ
ترانەیێن وی یێن تەمەت سیڤاندۆکان
نازکی ژێ دباری و
مێرگێن دلێن هەمیان د پێکان و پێخواس ددا ناڤ
دەرگەهێ ژورا وی هەر ل تاق بوو
ئاریشا چ چارە بۆ.. نەء
چارەیا وێ ل جەم وی وەکو ڤەخوارنا ئاڤا سار بوو
بیست سالن، لاڤا بۆ دبارن ژ دەڤێن تەنگەزار
بیست سالن، ئاشێن قەنجیێ دکارن ژ چاڤێن ماندی و بەندەوار
وەکو ئاڤابوونا ڕۆژا گرنژینێ
ئەڤرۆ ئەو بەرزە بوو
وەکو زەلالیا کانیا ئەڤینێ
ئەڤرۆ شاپەڕێ پاقژیێ کەفنێ وی بوو
ئەڤ ڕیدانە، نە ڕیدان بوو
گازیکرن بوو
بۆ ڕوحا وی یا ژ ڕەنگێ لاپەرێ (فۆرقان)ا د دەستدا
بۆ پارزینکێ قەنجیێن د ملدا
ئەی هەڤالێ من، ئەی برایێ نە ژ دایک و بابێن من
تۆ بووی دڕ و ئەلماسا د بنێ دەریای دا.. ئەسمانی تۆ هەلبژارتی
تۆ بووی خەونا مرنێ ڤەوژارتی
ڕەونەقا گرنژینا تە
ژ یێن هەمی گول و بلبلێن زانینگەهێ پتر بوو
مەشیا تە.. ژ مەشیا هەمی کەوێن ئەڤی چیای ماقویل و سادەتر بوو
تە پیرۆزە تۆ هاتیە هەلبژارتن
بێ دادگەهکرن، بێ کێش و ڤەکێش
نەپێنگاڤەکێ ل پاش و نە ئێکێ ل پێش
مرنێ تۆ گەلەک زویکا بری
حەسرەت و خەریبی بۆ دلێن مە
یێن کۆن کۆن بوو ئاواز و گری
هەڤالێ من. ئەی برایێ نە ژ دایک و بابێن من
