رولێ پارتیێن ئوپوزسیونێ د ناڤبەرا کوتا پەزی و ئەرکێ نیشتمانی
زەنون سلێڤانەی / زاخو
د هەر سیستەمەکێ دیموکراسی دا، پارتیێن ئوپوزسیونێ ب چاڤێن ئاگەهدارێن جڤاکی دهێنە نیاسین. رولێ وان یێ گرنگە بۆ راگرتنا هەوسەنگیێ و چاڤدێریکرنا کارێن دەستهەلاتێ. لێ، د ڤی دەمی دا، دەنگەکێ هند هند پەیدا دبیت کو کارێ ئوپوزسیونێ ب “کوتانا پەزی دێریت، ئانکو رەخنەیێن وان ب چەشنەکێ دبینیت کو نە یێن ئاڤاکەرن، بەلکو تەنێ ل دیڤ لاوازیێن ئێکودو دگەریێن.
ئوپوزسیون؛ نە ب تنێ رەخنەگرتن
د فەرهەنگا سیاسەتا ساخلەم دا، ئوپوزسیون نە ب تنێ کوتانا پەزی یە، بەلکو ئوپوزسیون دۆکتۆرێ جڤاکی یە. هەروەسا دەربرینا نەرازیبوونێ ل سەر بڕیارێن هەلاوستی یان نەدروست، ئەرکێ سەرەکی یێ پارتیێن دەرڤەی دەستهەلاتێ یە. جوداهیا د ناڤبەرا کوتانا پەزی و “ئوپوزسیونێ دا ئەڤەیە،
کوتانا پەزی (تەخریبکاری): د ڤێ ئاستێ دا، ئوپوزسیون ب تنێ ل دویڤ هەلەیێن دەستهەلاتێ دگەریت بۆ شکاندنا شکۆیا وێ، بێ کو ئارمانجەکا نیشتمانی هەبیت یان پێشنیارەکا جێگر بۆ چارەسەریێ هەبیت. ئەڤە د بیتە ئەگەرێ بێهێزکرنا متمانەیا جڤاکی.
ئوپوزسیونا ئاڤاکەر (پێشڤەبرن): د ڤێ ئاستێ دا، پارتیێن ئوپوزسیونێ ب شێوازەکێ زانستی رەخنەیان ل کارناما حکومەتێ دگرن، و ل هەمبەر هەر رەخنەیەکێ، بەرنامەکێ جێگر یان چارەسەریەکا گونجای بۆ کێشەیان پێشکێش دکەن.
رولێ وان ل سەر ئاستێ نیشتمانی
پارتیێن ئوپوزسیونێ د شیانێن وان دا هەیە ببنە ئەگەرێ پێتڤی بۆ:
شفافیەتێ: ل رێیا دووڤچوونا داهات و خەرجیێن گشتی، رێگریێ ل گەندەلیێ بکەن،
بەرهنگاربوونا گەندەلیێ ب رێیا فشارێن سیاسی و میدیایی، دەستهەلاتێ ناچار بکەن لسەر بنەمایێن شەفافان کار بکەت.
پێشکێشکرنا مژارێن نوو: ئوپوزسیون د بیتە دەنگێ وان چینێن جڤاکی کو د ناڤ دەستهەلاتێ دا بێ پشتەڤان ماینە.
کوتانا پەزی؛ مەترسی بۆ سەر پرۆسەیا دیموکراسیێ
ئەگەر ئوپوزسیون د ئاستێ کوتانا پەزی دا بمینیت، ئەنجامێن وێ بۆ گەل و وەلاتێ مە دێ خراب بن. چونکی،
متمانەیا خەلکی ب پرۆسەیا سیاسی د کەڤیت.
گەشەیا ئابووری و جڤاکی تێدا رادوەستیت، ژ بەر کو ئارمانجا سەرەکی د بیتە “نەهێلانا ئێکودو نە “ئاڤاکرنا وەلاتەکی،
خەلک ژ پەیامێن سیاسی بێزار دبیت و بێ هیڤی دبیت.
پێدڤیە پارتیێن ئوپوزسیونێ ل هەرێما کوردستانێ ژ قوناغا “کوتانا پەزی دەربکەڤن و بگەهنە قوناغا “ئوپوزسیونا شارستانی. گەلێ مە د ڤی دەمی دا، ژ بلی رەخنەیان، پێتڤی ب پلان و بەرنامەیان هەیە. ئوپوزسیونەکا سەرکەفتی ئەو نینە یا زێدەتر رەخنەیان دگریت، بەلکو ئەو ئوپوزسیونە یا د شیان دا هەبیت خەلکی باوەر بکەت کو ئەو “جێگرەکێ باشتر و خزمەتکارەکێ دلسۆزتر بۆ داهاتی یە. ؛
