لێدوانا سەرۆکێ نەوەی نوێ: خیانەتەکا سیاسی د هەمبەر خوینا شەهیدان و بازرگانیکرن ب پاشەڕۆژا هەرێمێ ڤە …..

بلال عثمان شوشی

د دەمەکێ دا کو هەرێما کوردستانێ د بن گوشارێن دژوار یێن ناڤخۆیی و دەرەکی دا دەرباز دبیت و نەیارێن ڤێ قەوارەیێ ل دەلیڤەیەکێ دگەرن بۆ لاوازکرن یان ژناڤبرنا قەوارێ دەستوریێ هەرێمێ، سەرۆکێ جووڵانەوەیا نەوەی نوێ ب گوتارەکا خەڵک خەڵەتێن و تێکدەرانە دهێتە مەیدانێ لێدوانا وی یا ئەڤ جارە کو دبێژیت: “یان سەرۆکێ حکومەتێ بو مەیە یان ژی هەرێم نامینیت “ نە تنێ لادانەکا سیاسی یا ئاشکرایە ، بەلکو بازرگانیکرنەکا بێشەرمانەیە ب چارەنووسێ نەتەوەیەکێ و خیانەتەکا مەزنە د هەمبەر وێ خوینا هاتیە ڕشتن بۆ ئاڤەدانکرنا ڤێ قەوارەیێ.
ئەو قەوارەیێ ئەڤڕۆ ناڤێ وێ “هەرێما کوردستانێ” یە، دۆکانەکا حزبی یان کۆمپانیەکا بازرگانی نینە تا کەسەک بهێت و مەرجێ مان یان نەمانا وێ ب کورسیێ خۆ یێ دەسهەلاتێ ڤە گرێ بدەت ، ئەڤ خاک و کیانە ب دروشمێن فەیسبووکی و ڕیکلامێن سۆشیال میدیایێ ئاڤانەبوویە ، ئەڤە بەرهەمێ ڕووبارەک ژ خوینا شەهیدێن ئەنفال و کیمباران و ئەشکەنجەدان ، و ب دەیان هزار پێشمەرگێن قارەمانە کو ل چیایێن بلند و د سەنگەرێن شەرەفێ دا گیانێ خۆ بەخشییە دا کو گەلێ کورد ببیتە خودان قەوارە ، کێمکرن و کورتکرنا ڤێ مێژووا پڕ ژ خەبات و قوربانیدانێ د قۆناغەکا پۆست و پۆزیشنێن شەخصی دا، سووکایەتیا هەرە مەزنە ب پیرۆزیێن نیشتمانی د هەمبەر دا دهێتە کرن ، ئەڤ جۆرە لێدوانە نیشان ددەت کا چەند عەقلیەتەکا سست و برسییا دەسهەلاتێ د پشت ڤێ جووڵانەوەیێ دا هەیە، کو ئامادەیە قەوارێ وڵاتەکێ ڕاستەقینە بکەتە قوربانی خەونێن خۆ یێن دەسەڵاتداریێ ،
ئەڤ گوتارا تێکدەرانە پەردەیێ ژ سەر ڕوویێ ڕاستەقینێ خەڵکخەڵەتاندنێ لادەت ، ل کیش ولات و فەلسەفەیا سیاسی دا هاتیە کو چارەنڤیسێ گەلی و پاراستنا ئاخ و کەرامەتا نەتەوەیەکی ب جێبەجێکرن یان جێبەجێنەکرنا مەرامێن شەخصی یێن سەرکردەکێ حزبی ڤە بهێتە گرێدان ، ئەڤ ئاخفتنە نەک تنێ خزمەتا نەیارێن دەرەکی یێن هەرێمێ دکەت، بەلکو ئاراستەکرنا تیرێن ژەهراوی یە بۆ ناخێ جڤاکی دا کو نائومێدیێ د ناڤ گەنجان دا بەڵاڤ بکەن ، د ڕاستی دا هەولدانەکە بۆ ڕەشکرنا هەموو دەستکەفتێن دەستووری و سیاسی یێن گەلێ کورد ل پێناڤ دەستکەفتەکێ کاتی .
پێویستە ل سەر جڤاکێ کوردستانێ، ڕۆژنامەڤان، پێشمەرگە، و کەسوکارێن سەربڵند یێن شەهیدان، ب توندی ل هەمبەر ڤێ گوتارا مەترسیدار ب راوەستن ، پێویستە هۆشیاریەکا نیشتمانی یا دژوار هەبیت کو ڕێ ب هیچ بازرگانەکێ سیاسی نەهێتە دان پیرۆزیێن گەلی بۆ مەرامێن حزبی بەرزە بکەت ، هەرێما کوردستانێ ب ئیرادەیا گەلێ خۆ و ب بازوویێ هێزێن پێشمەرگەی دێ یا بەردەوام و سەرپێ بیت ، لێدوانێن “بۆگەن” و نەزۆک یێن ب ڤی شێوەی دێ چنە د زبڵدانا مێژوویێ دا، و ئەوا دێ مینیت دیسان خوینا گەشا شەهیدان و شکۆیا قەوارەیێ هەرێما کوردستانێ یە …