کەس ل کەسی ناچیت!!!

قابیل محەمەد

دناڤ کاودان و هات و هەوار و بلندبوون و گیروبوون و نەراستی و زگ رەشی و مەلاقی و بێ وەفای خزم خزمایەتی و بەرژەوەندخوازی و بێ نمکی و دوو ریی و نەزانی و ئاغاتی و عەشیرەتگەری و خۆپەرستی و ‌پاشکەفتی رۆژ نەرۆژە شەڤ ژی نەشەڤە، دبینین مەڕ شێری راڤ دکەت گۆرک ژی ناڤبژیڤانە، ژیانەکا پڕ خەیالە لێ خەیالەکا بێ رامان سپێدەهی وەکی ئێڤاریە دلێ مە دگەل دەنگێ بولبلا یێ پڕە ژ نەڤیانێ.
نزا ئەزێ بەرەف لاوازبوونا تێگەهشتنێ دوماهیێ رێکێ و ئاڤابوونا رۆژێ و وەلاتێ تاریێ و ئارامیێ دچم تێناگەهم ل ڤی سەردەمی کەس ل کەسی ناچی بەروڤاژی کەلتور بنماو ئالنکاری پیرۆزیێ کوردەواری رۆژ دووبارە دبن، گۆتنێ نەراست و کارێن بەدرەوشت و مەلاقی و پێکەنین بووینە پاشا و دەستهەلاتدار و رێنمایی کار.
ل شۆڤا گوندێ مە چ گول وەکو خۆ شین نابن ئاڤ نەبوویە ئاڤەدانی و بهار ل پایزی سەوزدبی پایز ژی ل بهارێ بەلگ و گولێن بێ مراد د وەرینیت.
ئەرێ چەند کەس وەکو من هەنە ناڤ ڤان کۆلە بیردانکێن هزری بێ ئارمانج و دڵ پر پرسیار و پرهیڤی و ئاوات گۆتنا حەق لێ بوویە دوژمن نەشێن بێژیت و بگەهینیت.
هەردەم بابێ مە دگۆت:
کارێن باش باشی پێڤە دهێت
راستبە و رێکا شێری بگرە
چ بچینی دێ وی هەلینی
دەستێ ماندی ل سەر زگێ تێرە
پەتێ درەوێ یێ کورتە
ئەرێ کەسەک هەیە شروڤە و تێروانینا بۆ ڤان گۆتنا و سەربورێن مەزن و رێ نیشاندەرێ مەبکەت، هزر ل هزرا نابن پشتەڤان دەنگەک ب تنێ نابیتە قەهرەمان کێ دی هەیە ئاڤر ل ئاڤابویێت ئارامیێ بدەت و تەناهیێ بۆ بابەکێ سال چویی ڤەگەرینیت رێکێ بدەتێ ب حسرەتا روناهیێ رابیتەڤە رۆژەکا نوو بهەلیت.
بێدەنگ بوون دوماهی چارەسەرە مینا ئەهریمەنەکێ کەڕ و لال…