وەزارەتا دارایی یا هەرێمێ: وەک سالێن بۆری ل سەر بجهئینانا هەمی گاڤێن دابەشکرنا مووچەیی بەردەوامین
وەزارەتا دارایی و ئابۆری یا حکومەتا هەرێمێ راگەهاند، “هەتا نوکە چ رێککەفتن و بریارەکا نوی بۆ دابەشکرنا مووچەیی نینە” و چ بریار و رێنماییەک ل دۆر خەرجکرنا مووچەیی ژ وەزارەتا فیدرال ڤە نەگەهشتییە وان.
دەقێ راگەهاندنا وەزارەتا دارایی:
ل دۆر رێکارێن خەرجکرنا مووچەیێ فەرمانبەر و مووچەخۆرێن هەرێما کوردستانێ بۆ سالا 2026ێ، دەما چەندین رۆژانە چەندین لێدوان و شرۆڤەکرن و لێکدانێن نەدروست ل سەر وی بابەتی ژ پشکەکا میدیایان بەلاڤ دبن، مە ب پێدڤی زانی ڤان رۆهنکرنان بدەین.
● هەتا نوکە ژ وەزارەتا دارایی یا حکومەتا فیدرال ڤە چو بریار و رێنماییەک ل دۆر رێکارێن خەرجکرنا مووچەیی بۆ سالا دارایی 2026ێ نەگەهشتییە وەزارەتا دارایی یا هەرێما کوردستانێ.
● هەتا نوکە چو رێککەفتن و بریارەکا نوی بۆ دابەشکرنا مووچەیی نینە.
● وەزارەتا دارایی و ئابۆری هەر وەک سالێن بۆری ل سەر بجهئینانا هەمی گاڤێن دابەشکرنا مووچەیی بەردەوامە.
● چو کێشەیەک ل بەرسینگێ وەزارەتا دارایی یا حکومەتا هەرێمێ بۆ هنارتنا راپۆرتا تەرازوییا پێداچوونێ و لیستەیا مووچەیی نینە و ل هیڤییا ئەنجامێن خالا ئێکێیە (ئانکو بریار و رێنماییێن نوی بۆ خەرجکرنا مووچەیی د سالا 2026ێ دا).
لەوما هیڤییە هەر کەس و ئالییەکێ کو شارەزایێ ڤان رێککەفتن، رێنمایی و رێکاران نینە، زانیارییێن شاش ل سەر لیستەیا مووچەیی و بابەتێ (120,000,000,000) سەد و بیست ملیار دیناران بەلاڤ نەکەت، دا کو ب وێ رێکێ بخوازیت بۆ دەستکەفتێن کەسی یان سیاسی یارییێ ب هەست و سۆزا فەرمانبەر و مووچەخۆران بکەت.
بۆ چەندین جار دوبارە دکەین، هەر کەس و ئالییەکێ پێدڤی ب زانیارییان هەبیت د وی باری دا دەرگەهێ وەزارەتا مە ڤەکرییە.
وەزارەتا دارایی و ئابۆری
25ی کانوونا دویێ 2026
