مەها ڕەمەزانێ دناڤبەرا دوو سەردەمان دا: ژ دەنگێ دەهۆڵێ بۆ شاشەیێن مۆبایلێ……
مەها رەمەزانێ هەمیشە وەک مەها ئارامکرنا دەروونی و بهێزکرنا پەیوەندیێن جڤاکی هاتیە نیاسین، بەلێ دگەل هاتنا سەردەمێ تەکنەلۆژیایێ، گەلەک ژ داب و نەریتێن ڤێ مەهێ هاتینە گوهۆڕین ، ئەگەر ئەم ل رەمەزانا “بەرێ” و رەمەزانا “نوکە” بنێرین، دێ بینین جیاوازیەکا مەزن دناڤبەرا گەرماتیا دیوانان و ساریا شاشەیان دا پەیدا بوویە.
ل رەمەزانا بەرێ، خەلکی پشت ب سروشت و سادەیاتیێ دبەست و دەنگێ “دەهۆلا پاشیڤێ” تاکە ئالارم بوو کو مرۆڤ پێ ژ خەو رادبوون، و چەڤەڕێبوونا دەنگێ “تۆپا فتارێ” هەستەکێ جودا ددا گەڕەکێ ، تشتێ هەرە جوان “سینیێن فتارێ” بوون، کو مالان خوارن بۆ ئێکودوو دفرێکر و ب ڤێ چەندێ گیانێ هەڤکاریێ و جیرانیێ د لوتکەیێ دا بوو ، پشتی نڤێژا تەراویحان ژی، دیوانێن مەزنان پڕ دبوون ژ چیرۆک و کەیف و خوشیێن راستەقینە.
بەلێ ئەڤڕۆ، تەکنەلۆژیایێ شێوازێ ژیانێ گوهۆڕیە ، ئالارمێ مۆبایلێ جهێ دەهۆڵێ گرتیە و ئەپلیکەیشنێن ئایینی کارێ مە ئاسانتر کرینە، بەلێ لایەنێ جڤاکی پاشکەفتیە ، ئەڤڕۆ ل سەر سفرێ بەریا “بسمیلایێ”، وێنەگرتنا خوارنێ بۆ “ستۆریێ ئینستاگرامێ” و “ ستریکێن سناپێ “ بوویە کارێ سەرەکی، کو هندەک جاران هەستێ هەژاران بریندار دکەت ، ل شوینا کۆمبوونا ل دیوانان گەنج زێدەتر مژوولی “گرووپێن چاتێ” و یاریێن ئۆنلاینن هەتا سپێدێ، کو ئەڤە ژی کارتێکرنێ ل بەرەکەتا دەمی و نڤستنێ دکەت.
د ئەنجام دا، تەکنەلۆژیا چەند یا ب مفاش بیت، نابیت ببیته دیوارەک دناڤبەرا مە و ڕاستەقینە یا رەمەزانێ ، یا فەر ئەوە ئەم تەکنەلۆژیایێ بۆ خزمەتا ئایینی و مرۆڤایەتیێ بکاربینین، نەک بۆ کێمکرنا وان بەها و رەوشتێن جوانێن کو مە ژ باب و باپیرێن خۆ وەرگرتین.
