پەیڤدارێ پارتی دیموکراتی کوردستان ڕاگەهاند
ئەڤرۆ شەمبی، مەحموود محەمەد، پەیڤدارێ پارتی دیموکراتی کوردستان، جەخت ل سەر بەردەوامیا بزاڤێن پارتیا خۆ کر بۆ دوماهیئینان ب قەیرانا سیاسی و لەزکرن د پێنگاڤان دا بۆ پێکئینانا دەستەیا سەرۆکاتیا پەرلەمانی و کابینەیا نوو یا حکوومەتا هەرێما کوردستانێ.
د داخویانیەکا ڕۆژنامەڤانی دا بۆ دەزگەهێن ڕاگەهاندنێ، مەحموود محەمەد ڕاگەهاند: “دەرگەهێ پارتی دیموکراتی کوردستان ڤەکرییە و شاندا مە سەرەدانا هەمی لایەنێن سیاسی یێن هەرێما کوردستانێ کرییە. بزاڤێن مە بەردەوامن بۆ دەربازکرنا بنبەستێ سیاسی و گەهشتن ب ڕێککەفتنا پێدڤی، بۆ ئەڤێ مەرەمێ ژی ئەم دێ هەر پێنگاڤەکا پێدڤی هاڤێژین داکو کێشە بهێنە چارەسەرکرن.”
سەبارەت ب دەسپێشخەریێن سەرۆک بارزانی، پەیڤدارێ پارتی ئاماژە ب هندێ کر: “پەیاما سەرۆک بارزانی گەلەک ڕوون و ئاشکرا بوو، داخواز ژ هەمی هێز و لایەنێن سیاسی یێن کوردستانێ کر کو بەرژەوەندیێن باڵا بێخنە سەری هەر ئارمانجەکێ و دوماهیێ ب ئێکدوورکەفتنا سیاسی بینن. جەخت ژی ل سەر هندێ کر کو پێدڤییە پشتی جەژنێ بزاڤ بهێنە چڕکرن بۆ پێکئینانا سەرۆکاتیا پەرلەمانی.”
هەروەسا مەحموود محەمەد بەحسێ هندێ ژی کر کو تا نوکە چ دەمەکێ دیاریکری بۆ کۆبوونەوا لایەنێن سیاسی نەهاتیە دەستنیشانکرن، بەلێ جەخت کر کو پارتی پشتهەڤیا هەر پێنگاڤەکا تەوافوقی دکەت کو ببیتە ئەگەرێ پشکداریا هەمی لایەنان د پرۆسەیا سیاسی دا.
د تەوەرەکێ دی یێ داخویانیا خۆ دا، پەیڤدارێ پارتی تیشک ئێخستە سەر پەیوەندیێن د ناڤبەرا هەولێر و بەغدا دا و ڕاگەهاند: “پەیوەندیێن مە دگەل حکوومەتا فیدراڵ بەر ب باشتربوونێ دچن. پێدڤییە حکوومەتا فیدراڵ دەستێوەردانێ بکەت بۆ چارەسەرکرنا وان ئاستەنگێن بۆ بژێویا وەلاتیێن هەرێما کوردستانێ هاتینە دروستکرن و پابەندی بەڵێێن خۆ بیت بۆ چارەسەرکرنا خالێن ناڤکۆکی.”
ئەڤ داخویانیێن پەیڤدارێ پارتی دیموکراتی کوردستان د دەمەکێ دا نە، کو سەرۆک بارزانی د پەیامەکێ دا ب هەلکەفتا جەژنا قوربانا پیرۆز داخواز ژ لایەنێن سیاسی کربوو ب گیانەکێ نیشتمانی کۆببنەڤە بۆ چارەسەرکرنا قەیرانان و دوماهیئینان ب بنبەستێ سیاسی ل هەرێما کوردستانێ.
