دوو کچێن ئێتیم و نشتیمانەکێ پڕی برین، زەرگەزەوی داستانا بێگونەهیا کوردانە
نڤیسین: نیهاد سالح رەشید
دیرۆکا مە کوردان، نڤیسینا ئازادیێیە ب مەرەکا ژ خوینێ و پەڕەکا ژ جەستەیێ مەزلوومان، هندەك شەڤ ل ڤی وەلاتی هەنە، تاریاتی ب دەنگێ بای ناهێت، بەلکو ب کینا درۆنێن ستەمکاران دهێتە بارانین، ئەوا ل ڤان شەڤان ل ئاسۆیا کوردستانێ و گوندێ زەرگەزەوی قەومایی، تەنێ پەلامارەکا تەکنیکی نەبوو، بەلکو تەقینا وێ ڕق و کینا کۆرە بوو کو چ جاران چاڤێ وێ ب حەسانە و ئارامیا لاندکا کوردان ڕانەبوویە.
کەفتنا هەڤژینێن دلسۆز، (مووسا ئەنوەر ڕەسول) و (مژدە ئەسعەد)، د ناڤا کۆچا وان یا سادە و خودایی دا، هەژاندنەکا ویژدانییە بەرامبەر بێدەنگیا جیهانێ، کێ ل ڤی سەردەمێ مرۆڤایەتیێ ببیستیت کو هەڤژینەك و هاوژینا وی، ببنە قوربانی و سووتەمەنیا چەکێن کینێ، تنێ ژبەر کو ل سەر ئاخا باب و کالان د خەمخۆر و نشتیمانپەروەر بوون؟ ئەڤە ئەو کارەساتە بریندارەیە کو دێ د دیرۆکێ دا وەك شەرمەکێ ل سەر نێچا چاڤێن ستەمکاران مینیت.
ڕێبەرێن ڕێبازا بارزانی، سێبەرا نشتیمانی بۆ ئێشێن گەل: د ناڤ جەرگێ ڤێ خەمێ دا، هەلویستێ شکۆدار یێ ڕێبەرێن مە، دیسا سەلماند کو ئەڤ ڕێبازە نەك تەنێ قوتابخانەیەکا سیاسییە، بەلکو باوەشەکا نەتەوەیی یا سنۆرە بۆ هەر تاکەکێ کورد، ئامادەبوونا ڕێزدار سەرۆك مەسعود بارزانی، مەرجەع و هێمایا ئیرادا گەلێ مە، ل سەر تازی و پرسەیا شەهیدێن زەرگەزەوی، پەیامەکا مەزن بوو کو خوینا چ هاووەلاتیەکێ کورد بێخودان نینە.
هەروەسا، خەمخۆریا ڕێزدار نێچیرڤان بارزانی و ڕێزدار مەسرور بارزانی، ئاشکراکرنا وێ ڕاستیێ بوو کو سەرکردایەتیا سیاسی، خەما مالباتان ب خەما خۆ دزانن. دیمەنێ هەری کارتێکەر، پەنادانا هەردوو کچێن چاوگەش یێن شەهیدان بوو د ناڤ سەنگ و شکۆیا ڤان ڕێبەران دا؛ ئەو دیمەنێ کو ب دەنگەکێ بلند گۆتیە هەمی جیهانێ: “ئەڤ زارۆکە ئەگەر ژ سۆزا دایک و بابان بێبەش بوون، لێ د باوەشا ڕێبازا پیرۆزا بارزانی دا دێ ب سەربەرزی مەزن بن و نشتیمان هەمی دێ بیتە باب و پشت و پەناهـ بۆ وان.”
ئیرادەیا د ناڤ تاریاتیێ دا ناهێتە شکاندن: وەکی جەنابێ سەرۆک بارزانی فەرمووی: “شەهیدکرنا وەلاتیێن سڤیل چو شەهامەت و سەربەرزی تێدا نینە.” ئەڤە پەیاما مللەتەکی یە کو ب ئازار و قوربانیان ناهێتە تێکشکاندن. جوامێری ل مەیدانا جەنگی یە، نەك ب ئامرازێن ترسنۆکانە ژ دوور ڤە خەوا زارۆکان و ئارامیا گوندنشینان بکەی ئارمانج. ئەڤ هێرشە نیشانا بێهێزی و ترسا نەیارانە ژ شکۆیا کوردستانێ، ڕێبازا بارزانی فێر کرین کو هەر چەند خوین بێتە ڕێشتن، گاڤێن مە بەرەڤ ئازادیێ دێ موکۆمتر ل سەر ئەردی چەسپێن.
کوردستان هەر دێ ئاڤەدان مینیت: ئەم وەك خەلکێ ئازادیخوازێ کوردستانێ ب سەرەکێ بلند و دلەکێ پڕی ئێش، دووبارە دکەینەڤە؛ خەونا دۆژمنان بۆ تێکدانا حەسانیا مە دێ هەر مینیتە خەیالەکا پووچ، کوردستان دێ هەر ب ئاڤەدانی و ب ڕووحا پێشمەرگایەتیێ مینیتە چەقڵێ چاڤێ حەسوود و نەیاران. خوینا گەشا شەهیدێن زەرگەزەوی و ێشمەرگەی، بۆ مە بوویە سوێندەکا نوی کو هەردەم د وەفادار بین بۆ ڤێ ئاخا پیرۆز.
هەزاران سلاڤ ل ڕووحا بلندفڕا شەهید مووسا و شەهید مژدە بن، شەهید وەیسی ئاخر. برینا وە دێ بیتە چرایێ هەری گەش بۆ ڕێکا ئازادیێ.
نەفرەت ل تیرۆر و کین و تاریاتیێ بن. سەربەرزی بۆ مالباتێن شەهیدان و نەمری بۆ کوردستانێ.
