ژ فەرزندە زوبێر ئاغا زێباری و خەلکێ دینارتێ بۆ سەروکێ حکومەتێ

فەرزندە زوبێر ئاغا زێباری، کەسایەتیێ دەڤەرا زێبارێ و پارێزگەها دهوکێ، داخوازییەکێ پێشکێشی سەروکوەزیران مەسرور بارزانی دکەت و دبێژیت، ئەوا ئەڤرۆ ل سۆشیالمیدیایێ ب گشتی و دەڤەرا نەهلێ و زێبارێ ب تایبەتی دهێتە باسکرن سەبارەت بابەتێ چێکرنا ڕێیا گەلیێ زنتا بۆ دەڤەرا زێبارێ و دەڤەرێن دی کو پتری 60 گوندان بخوڤە دگریت، داخوازیا مەژی یە، ژبەرکو ئەڤ رێیە ل سالێن 50ـان هاتییە چێکرن و هەتا نوکە وەک پێدڤی و ب گورەی خاستا خەلکێ دەڤەرێ نەهاتییە گوهۆڕین و دووبارە چێکرن ڤە.

زێدەتر گوت، ئەم پشتەڤان و هەڤکار و هەڤدەنگین ل گەل داخوازییا خەلکێ دەڤەرێ بۆ چێکرنا رێیا گەلیێ زنتا و دخوازین بهێتە چارەکرن.

ناڤبری دیارکر ژی کو ئەڤە یەک دێ ب رێیا دروستکرنا تۆنێلەکێ چارەسەریا بنبر بۆ رێیا دەڤەرێ بینیت و گوتژی، رێیا نوکە یا گەلیێ زنتا رێیەکا هەری مەترسیە و قەرەبالغەکا زۆر ل سەر هەیە، دەهان ترۆمبێلێن وەلاتییان ل دەمێ سەرەدان و گەشت و سەیران دمینن ئاسێ، زێدەباری وێ یەکێ کو چەند نەخۆش و کەسێن کارین بلەز هەیی دمینن ئاسێ، چەندین جاران بەر ل چیایی هاتینە خوارێ و ب ترۆمبێلێن وەلاتییان کەفتینە و چەندین کەس بریندار بووینە، زێدەباری کو تاکە رێیە ئاکرێ ب دەڤەرا زێبارێ و مێرگەسور و بارزانڤە گرێ ددەت.