ھەنسکی دایکم

ستار ئەحمەد

بڕوانە سیمای خەزانیم
چۆن ترێی چاوانم وشک بووە
حەسرەتم وەک گەڵا زەرد بووە
ھەناسەم دووکەڵە
فرمێسکی لێدەتکێ
رامێنە لەدڵم
شووشەی سەر مێزی ناکەسە
لەگۆشەی نەناسا کپ دەشکێ
دڵم زارۆکی ئەنفالە
بەدەمی سەگەوە لەت دەکرێ
مەراق لەھزرم دەچۆڕێ
بۆ توێشووی راوکەرو
چەتەی ئەو دیوی
سنووری غەدر دەبرێ
ئاونگی بەیانیان
ھەنسکی دایکمە
لەقەدو باڵای
ئاڵاو خاک دەچۆڕێ
سەرم لوتکەی ئەزمڕە
ناخم وجاخی شەھیدان
پەلێکم لەخۆرئاوایە
ئەوی دیم کوردستان
پۆشاکم کۆچباری باکوورە
لەباشور پاشماوەی پشکۆیە
ھەنگاوم کیژانی عەفرینە
ھەڵوێستم تەلبەندی گڵکۆیە
دەستێکم کەناری و
دەستەکەی تریشم ھەڵۆیە
چاوی راستم
کوانووی سووتانی خۆمە
چەپیشم
زیندانی ئەشکەنجەی تۆیە
جەستەم خاکێکە کەرت کراو
ھەناوم کانییەکە
تژییە لەخوێناو
من وێردی گیانەڵای ویژدانم
خۆزگەم ” ئاواتم ”
تاسەم ” زمانم
نەخشەی دورگەیەک برینم
تابلۆی ژەھراوی
نێو شانە ی ھەنگوینم