کەنگی دێ دەست ژ درامایێن تورکی بەردەن؟

نڤیسین: شیان مەهدی کانیسارکی

یا ژمن ڤە دیمۆکراتی ئێدی چ مفای نا گەهینیتە دەزگەهێن ڕاگەهاندنێ و یێن(سوشیالێ ژی)، هەر ژ دەستپێکێ ئەز داخواز ژ جهێن “دخەما” ڤی جڤاکی و وەلاتی دکەم، چارەیەکێ ل ڤێ ئاریشەیا مەزن بکەن، چونکی ب شێوەیەکێ نەئێکسەر “هندەک جاران ژی ئێکسەر” کارتێکرنەکا نەرێنی ل خێزانا کوردی دکەت. ئەڤجا ب گرۆڤەیێ وێ چەندێ کو پێشکەفتن و دیتنا پاشەرۆژێ ل بەر خێزانێ، گەنج و زارۆکی ڕوون دکەت. مە دەمەکی گازندە دکرن دەمێ دراما بێ وەرگێڕان یان “دوبلاژ” دەردکەڤتن، مە دگۆت دێ زمان و زاراڤێن مە تێکدەن و زارۆکێ مە ئێدی دێ کوردیێ ژ بیرکەت. لێ نوکە بابەتێن ڕەوشتی ب هیچ شێوەیەکێ لبەرچاڤ ناهێنەگرتن، لێ نوکە ڕاستە جهێ سوپاسیێ یە کو دراما هاتینە دوبلاژکرن بۆ کوردی”بەهدینی”، لێ هێژ پێدڤی کەزاختنێ یە، یان هەما د بنیڕا پەخش نەکەن. ئانکو نوکە ئەنجام دێ هوسا بیت” زمان دێ مینیت، لێ ڕەوشت و هندەک تشتێن خێزان نیشا ئەندامێن خوە ددەت لبەرپیان دچن. من باش هایژێ هەیە کو د ڤان سالاندا هندەک جوامێران یا دەست ب درارما کوردی کری، لێ هەر یا کێمە ئەم حەزدکەین ڕێژە زێدەتر ببیت، چونکی ڕاستی ژی ب تنێ “هەیڤا ڕەمەزانا پیرۆز” بەس نینە تۆ حەزا زمان، کەلتوور و ڕەوشتێن کوردی یێن ئۆرجینال ل دەف ڤی بەرەبابی خۆرت بکەی. ئەز دێ هندەک نموونەیان ل سەر ڤێ چەندێ ئینم، دا پیچەکێ شاشی و مەترسیا ڤان دڕامایان بەرچاڤ ببیت. ئێک: دێ بینی کەنالەکی دڕامایەک یا ئینای و پەخش دکەت، ڕاستە یا دوبلاژکری بۆ بەهدینی، لێ وەکی دی کەسەکە ئەو ب وەلاتێ خوەڤە یێ گونەهکارە ب ڕێژتنا هزاران کوردێن بێ گۆنەهـ و تالانکرنا سەدان گۆندێن سەرسنور، ژ بلی ڕەڤاندنا کچ و ژنێن وان، دێ بینی ب هەمی شانازیژی ڤە ئێدی خەلک دێ فێربیت ناڤێن وان ئەکتەران دەینیتە سەر زارۆکێن خوە”چونکی تە ئەو دچاڤێن دەیک و بابان ژیدا کرنە قەهرەمان”. دوو: من دیت ل کەنالەکی درامایەک دهاتە پەخشکرن، ئەکتەرێ سەرەکی زارۆکبوو، ئەو زارۆکە ب وی تشتی یێ بەرنیاسە کو لبەرکەسێ نە دەینیت، هزرێ بۆ کەسێ نەکەت نە بچویکی و نە مەزنی، نە ماموستایی و نە ڕێڤەبەرێ قوتابخانێ و هەر د درامایێ ژی دا دەیک و باب پشتەڤانێن سەرەکی یێن وی کورکینە. دەمێ ئەم دبینم ل مال زارۆکیێ تەماشەی ڤێ درامایێ دکەن و کەیفا دەیک و بابێن “هەژار” گەلەک یا هاتی کو زارۆکێن وان بێی شەڕ و هارهاری یێن ڕوینشتین و ب جوانی تەماشە دکەن. لێ ئەو نزانن چ کارتێکرن یا ل زارۆکێ وان دبیت. لەورا تەماشە بکە وان دەیک و بابان دێ چەند نەخوەشیێ و ئەزیەتێ ل سەر پەروەردەکرنا وی زارۆکی بەن. زڤستانێ هەدیێ یێ دچن قوتابخانێ داکو مفایەکی وەرگرن، ل وەرزێ هاڤینێ دێ وێ ماندیبوونێ هەمیێ لێکدانی سفرێ کەن. ئەڤجا هیڤیا من ئەوە ڕێڤەبەرێن کەنالان ب ڤێ گۆتارێ سل نەبن! لێ پتر کار ل سەر دراما کوردی یا ڕەسەن بکەن.